Fahrlehrer

Marco Zurwerra

Fahrlehrer mit eidg. Fachausweis (B BE)

Ich bi am 15.04.1987 giboru und sit 2016 verheiratut. Üfgwachsu bini zämu mit minum Brüeder und mine Eltre z’Glis. Di ganz obligatorisch Schüelzit hänni öi z’Glis uberstandu.

Nach der Zit in der OS hets mi de uf Brig ins St. Ursula gizogu. Ich hä d’Handelsmittelschüel im Jahr 2006 abgschlossu. Wenni endli mis Diplom im Sack hä khä, hänni scho in d’Armee miessu. 1 Jahr lang bini de Radschützepanzer im Militer gfahru.
Als Durchdiener hänni verschideni Isätz khä. Zum Bispill Botschaftsschutz z’Bäru oder z’WEF.
In dem Momänt wahni miini Dienschttäg abgarbeitut hä, hänni im erschtu Momänt nix meh vam Militer wellu wissu. Ich hä mier de d’Frag gstellt: Wie weiter? Ich bi de zum Entschluss cho, dasi no es bits epis va der Wält will gseh und derbi no eperum hälfu.
Darum hänni mi de trotzdem nu  fer de Üslandisatz va der Armee entschidu. Nach der Rekrutierig bini de in de Kosovo. Äs isch en lehrrichi Zit fer mich gsi und ich hä andere Mänsche chännu hälfu.
Nach cirka 4 Jahr hets mi de wieder zrug ins Wallis gizogu. Und wider bini vor der Frag gstandu: Wie weiter? Fer mich isch sofort klar gsi, jetzt het mer gnüeg eper andersch befolu, jetzt wärdi miini eigund Chef.
Will ich öi im Üslandisatz scho Lit an Fahrzig üsgibildut hä und mier das vill Spass het gmacht, bini de uf de Fahrlehrerprüef cho. Nach der abschlossu eidg. Prüfig fer Fahrlehrer hänni sofort mit miner eigunt Firma losgleit.
Wies sie so geit im Läbu hänni de der Hubert gitroffu und mich sofort güet mit ihm verstandu. Darum heiwer zämu d’let’s roll Fahrschule eröffnet.

Hubert Summermatter

Fahrlehrer mit eidg. Fachausweis (B BE C CE D DE) 

Hallo Midenand

Ich bi am 3. Januar 1978 giboru, ha 3 Schwesträ eini Chindergärtneri, eini Lehreri und eini bitrieb der Püruhof va ischum Vater witer. Ich bi in Grechu und Herbriggu üfgwagsu und durch de Hof vam Papa sehr früä uf Auto und Maschine umchagfahru. Sit 2007 bini verheiratut und ha 2 Chind, as Meitji und en Büäb.

Mini erst Üsbildig isch der Automech gsi, gfolgt vam Landwirt. Ich ha gad fasch alli Permi gmacht, bi 3 Jahr Camio gfahru und ha an diversu anneru Orte gschaffut. 4 Jahr hani bim Walliser Baumeisterverband Baumaschinu- und Kranfiärer üsgibildut und Prüffige abgnu. Während der Zit hani du Fahrlehrer und der Erwachsunubildner SVEB 1 gmacht. Aschliässund 2 Jahr in Thun als Agstellte Fahrlehrer mich angaschiärt. Sit 4 Jahr bitribi mini Fahrschüäl in Visp, im vergangunu Jahr hani di Züäsatzüsbildig zum Camio- und Carfahrlehrer gmacht und jetz mi entschlossu mim Marco der gmeinsam Schritt ini Züäkunft ts ga.

Ich bi en Mänsch wa vorwärts lüägt, ehrlich isch und züälosut. Ich bi fer zum Fahru uf d Wält chu, also – let`s roll am Bestu zämu.